خلە و خولە و، بەزمی حاجیەکان!

هیوا ناچار

خلە: خولە بۆ کوێ دەچی؟

خولە: خلە دەچم بۆ حەج!

خلە: ئێ ئێ بەزمەکەیە خولە، بڵێ دەچی بۆ پاڵپاڵێن...!

خولە: پاڵپاڵێنی چی چەنەباز؟

خلە: چەنەبازی چی خولە، ئەی لە قەرەباڵغیەکەی حەج، هەر بەپاڵەپەستۆ ناڕۆی و هەر پاڵپاڵێن نیە؟

خولە: ئەی چی بکەین خلە، هەر دەبێ پاڵبنێین، بە خۆشی خۆمان نیە!

خلە: کەواتە حەجکردن واتە پاڵپاڵێن خولە؟

خولە: نا خلە، بەڵام پاڵپاڵێنیشی تیایە بەینی خۆمان بێ!

خلە: ئێ خولە، تۆ دەچی بۆ ماڵی خوا، چۆن دەبێ پاڵ بنێی بەخەڵکانی ترەوەو ئازاری ئەوانیدی بدەی؟!

خولە: خلە، ئەوە حەجەو واجبە دەبێ پاڵبنێیی، گوتم: بەدەست من و تۆ نیە!

خلە: ئای لە خولە، واجبی چی و تەڕەماشی چی! چۆن دەبێ پاڵ بنێی بە کەسێکی تر، ئەی ئەگەر ئەوکەسە کەوتە ژێرپێت و گیانی لەدەستدا؟!

خولە: خلە بۆ تێناگەی، ئەوە ماڵی خودایەو پیرۆزە، کێ دەمرێ نامرێ جاڕبەجەهەنەم، بەڵکو گرنگ ئەوەیە تۆ سەردان و واجبەکەی حەج لە کۆڵ خۆت بکەیەوە!!!

خلە: ئای لە ویژدانی خولە! کەواتە حەجەکەت تەنها کٶڵێکەو دەچی لەمەککە فڕێی دەدەی، جا گرنگ نیە بەو کۆڵەپشتە(حەج)ە، کێ ئازاری پێدەگا یان دەمرێ؟!

خولە: خلە، نەخێر گرنگ نیە(مادام حەج دەکەی!)!!!

خلە: بەخوا خولە، ئەو حەجکردن و پاڵپێوەنانە کارێکی زۆر ناڕەوایە(کوشتارگەیە!!!)!

خولە: جا خلە، کەی تۆ نوێژکێت کردووە تا باسی ناڕەوایی بکەی؟ هەی قەشمەر!

خلە: باشە خولە من قەشمەرم، بەس توخوا یەک پرسیاری تر؟

خولە: دەی چەنەباز!

خلە: ئەرێ وایە خولە لەکاتی ڕێوڕەسمی حەجکردن شەیتان ڕجم دەکەن؟

خولە: ئەی چۆن خلە، شەیتان ڕجمکردن لەهەمووی خێرترە!

خلە: ئێ باشە خولە بۆ شتێ ناکەن؟

خولە: شتی چی فشەکەر!

خلە: خولە، بۆچی واز لەسعودیە ناهینن و شەیتانەکانی کوردستان ڕجم ناکەن لەبری شەیتانەکانی سعودیە، خێرتان دەگا؟

خولە: وەڵا خلە وام زانی فشە دەکەی، بەڵام بەزاتی خوا شەیتانەکانی کوردستان ڕجم بکرێن خێرترە نەک سعودیە!